Kerala Public Service Commision examination questions, online psc exam

History of Malayalam Language (മലയാളം)

UPSC, PSC, BANK, RAILWAY,etc. Examination Questions

PSC Question and Answer about Malayalam previous questions including for Kerala Administrative Service (KAS), Secretariat Assistant, Panchayath Secretary, BDO, Auditor, Assistant, LDC and LGS examination level questions. We will update balance portion of the study material.....

മലയാളഭാഷയും സാഹിത്യവും.-നൂറ്റാണ്ടുകളിലൂടെ

രണ്ടാം ഭാഗം.(Part-12, Part-13, Part-14, Part-15 -എന്ന് നാലു്‌ ലേഖനങ്ങൾ)

മിഷണറിമാരുടെ സംഭാവന.

കേരളത്തിലെത്തിയ വൈദേശിയരായ മിഷണറിമാർ എപ്രകാരമാണു്‌ മലയാളഭാഷയേയും സാഹിത്യത്തേയും സമ്പന്നമാക്കിയതെന്നു്‌ പരിശോധിക്കാം. പതിനാറാം ശതകാന്ത്യത്തിൽ പോർട്ടുഗീസു്‌ മിഷണറിമാർ അച്ചടിസമ്പ്രദായത്തിനു്‌ തുടക്കം കുറിച്ചു. 1577-ൽ കേരളത്തിൽ അച്ചടിശാലകൾ സ്ഥാപിച്ചു. "ക്രിസ്തീയമതതത്വം" "ക്രിസ്തീയവണക്കം" തുടങ്ങിയകൃതികൾ, തമിഴു്‌ ടൈപ്പുകൾ ഉപയോഗിച്ച് അച്ചടിച്ചു.

ലത്തീൻ(ലാറ്റിൻ) ഭാഷയിൽ എഴുതിയ "ഹോർത്തൂസു്‌ മലബാറിക്കൂസു്‌" ഡച്ചുകാർ ആംസ്റ്റർഡാമിൽ നിന്നും പ്രസിദ്ധികരിച്ചു. 1678 നും 1703 നും ഇടയിലാണിതു്‌.പന്ത്രണ്ട് വാള്യങ്ങളായാണു്‌ ഇതു്‌ പ്രസിദ്ധീകരിച്ചതു്‌. മലയാളലിപികളുടെ അച്ചടിച്ചരൂപങ്ങൾ ആദ്യമായി കാണുന്നതു്‌ ഈ കൃതികളിലാണു്‌. മലബാറിലെ(ഇന്നത്തെ കേരളത്തിലെ) ഔഷധസസ്യങ്ങളുടെ ചിത്രങ്ങളും വിവരണവുമാണിതിന്റെ ഉളളടക്കം. അഡ്മിറൽ വാൻ റീഡിന്റെ രക്ഷാധികാരത്തിലാണു്‌ ഈ പുസ്തകനിർമ്മാണം.ഈ മഹത്തായ ശ്രമത്തിൽ മാത്യൂസ് എന്ന മിഷണറിയും , രംഗഭട്ടു്‌,അപ്പുഭട്ടു്‌,വിനായക പണ്ഡിറ്റ് എന്നീ ഗൗഡസ്വാരസ്വതബ്രാഹ്മണരും,ഇട്ടി അച്യുതൻ എന്ന ഈഴവ വൈദ്യനും നല്കിയ സംഭാവന എടുത്തുപറയത്തക്കതാണു്‌. താളിയോലയിൽ വട്ടെഴുത്തിൽ എഴുതിയ ഇട്ടിഅച്യുതൻ വൈദ്യരുടെ (ചേർത്തലക്കാരൻ)കൈയെഴുത്തിലുളള ഭാഗങ്ങൾ ഇതിൽ ഉൾപ്പടുത്തിയിട്ടുണ്ടു്‌. ആദ്യമായി അച്ചടിച്ച മലയാള "ലിപി" അദ്ദേഹത്തിന്റെ സാക്ഷ്യപത്രമായിനല്കിയ ഭാഗത്തു്‌ കൈയെഴുത്തിൽ കാണാം:-......."മലെയാളത്തിലെ വൃക്ഷങ്ങളും ചെറുവൃക്ഷങ്ങളും വള്ളികെളും പുൽക്കുലങ്ങളും അതിന്റെ പുഷ്പങ്ങളും കായെകളും വിത്തുകെളും.....................പറങ്കിപ്പാഴെയിലും മലെയാം പാഴയിലും വകതിരിച്ചു്‌ ചൊല്ലുകയും.." ചെയ്യുന്നുവെന്നു്‌ സ്വന്തം കയ്യക്ഷരത്തിൽ എഴുതിയതാണു്‌ ആദ്യമായി അച്ചടികണ്ട മലയാളം ലിപി! ഈ ഗ്രന്ഥം ഡച്ചുകാർ ഭാരതത്തിനു്‌ നല്കിയ ഏറ്റവും" മഹത്തായ സംഭാവന"യാണു്‌

പിന്നീടു്‌, കത്തോലിക്കാ മിഷണറിമാർ മലയാള വ്യാകരണഗ്രന്ഥങ്ങളും നിഘണ്ടുക്കളും നിർമ്മിച്ചു

  1. 1699-ൽ കേരളത്തിൽ വന്ന ജർമ്മൻ മിഷണറി അർണ്ണോസ് പാതിരി പതിനെട്ടാം ശതകാദ്യം ഒരുവ്യാകരണവും നിഘണ്ടുവും എഴുതി.
  2. 1712-ൽ ആൻജലോഫ്രാൻസിസ് ഒരു മലയാള ലഘുവ്യാകരണം എഴുതി.
  3. പതിനെട്ടാം ശതകത്തിന്റെ രണ്ടാം പകുതിയിൽ ഫാദർ ക്ലമന്റു്‌ ഒരു നിഘണ്ടു പ്രസിദ്ധപ്പെടുത്തി. മിഷണറിമാരുടെ മലയാളപഠനത്തെ സഹായിക്കാൻവേണ്ടിയാണു്‌ ഇതെഴുതിയതു്‌.
  4. കരിയാറ്റിൽ ഔസേപ്പു്‌ കത്തനാരുടെ 1768-ൽ എഴുതിയ "വേദതർക്കം" മലയാളത്തിലെ ശ്രദ്ധാർഹമായ ക്രിസ്തീയ മതശാസ്ത്രഗ്രന്ഥമാണു്‌. ആദ്യത്തെഗദ്യകൃതിയെന്നും ചിലർ കരുതുന്നു. മലയാളം സുറിയാനി ലിപിയിൽ എഴുതിയിരിക്കുന്നു.
  5. ഫാദർ" ക്ലമന്റു്‌ പിയാനിയസ് " എന്ന മിഷണറി എഴുതി, 1772-ൽ റോമിൽ നിന്ന് പ്രസിദ്ധീകരിച്ച "സംക്ഷേപവേദാർത്ഥമാ"ണു്‌ ആദ്യവസാനം മലയാളം അച്ചുപയോഗിച്ചു്‌ മുദ്രണം നടത്തിയ ആദ്യ കൃതി.
  6. പാറേമ്മാക്കൽ തോമാകത്തനാർ രചിച്ച യാത്രാവിവരണ ഗ്രന്ഥമാണു്‌ വർത്തമാനപ്പുസ്തകം(അഥവാ റോമായാത്ര ). ഇതു്‌ മലയാളത്തിലെ ആദ്യത്തെ യാത്രാവിവരണഗ്രന്ഥമാണു്‌. പാറേമ്മാക്കൽ തോമാകത്തനാരും സുറിയാനി കത്തോലിക്കാപുരോഹിതനായിരുന്ന കരിയാറ്റിൽ മല്പാനും ഒരുമിച്ചു്‌ നടത്തിയ യൂറോപ്പു്‌ യാത്രയുടെ രസകരമായ വർണനയാണിതു്‌. 1778 -നും 1786- നും ഇടയിലായിരുന്നു ഈ യാത്ര.
  7. റോബർട്ട് ഡ്രമണ്ടു്‌ 1799-ൽ ഒരു മലയാളവ്യാകരണഗ്രന്ഥം (Grammar of the Malayalam Language)ബോംബെയിൽ നിന്നും പ്രസിദ്ധീകരിച്ചു. എഫു്‌ .സ്പ്രിംഗും ഒരു "മലയാളവ്യാകരണം" എഴുതി.ഈ രണ്ടു്‌ കൃതികളും ഇംഗ്ലീഷ് ഈസ്റ്റിന്ത്യാ കമ്പനിഉദ്യോഗസ്ഥരെ മലയാളപഠനത്തിന് സഹായിക്കാനായി രചിച്ചതാണു്‌.
  8. 1821-ൽ ബെഞ്ജമിൻ ബെയിലി കോട്ടയത്തു്‌ സി. എം. എസ്സു്‌.പ്രസ്സു്‌ സ്ഥാപിച്ചു. എണ്ണത്തിൽ കുറവും രൂപത്തിൽ വികലവുമായ ,മദ്രാസിൽ നിന്ന് കൊണ്ടുവന്ന , അച്ചുകൾ അദ്ദേഹം ഇഷ്ടപ്പെട്ടില്ല. എങ്കിലും അതുപയോഗിച്ചാണു്‌, "ചെറുപൈതങ്ങൾക്കു്‌ ഉപകാരാർത്ഥം പരിഭാഷപ്പടുത്തിയ കഥകൾ" അച്ചടിച്ചു്‌ പ്രസിദ്ധീകരിച്ച ച്ചതു്‌. "കേരളത്തിൽ അച്ചടിച്ച" ആദ്യ മലയാളം പുസ്തകം ഇതാണു്‌. (സംക്ഷേപവേദാർത്ഥം റോമിലാണു്‌ അച്ചടിച്ചതെന്നു്‌ ഓർക്കുക.)പിന്നീട് ,തദ്ദേശീയരായ ലോഹപ്പണിക്കാരുടെസഹായത്തോടെ ഉരുണ്ടവടിവുളള അച്ചുകൾക്കു്‌ രൂപംനൽകി. ഇന്നും ഈ അക്ഷരവടിവു്‌ നാം പിൻതുടരുന്നു.തടികൊണ്ടു്‌ ഒരു അച്ചടിയന്ത്രവും നിർമ്മിച്ചു. ബൈബിൾ വിവർത്തനം, രണ്ടു്‌ ഡിക്ഷണറികൾ,{A Dictionary of high&colloquial Malayalam(1946) and A Dictionary ,English and Malayalam(1849) } സത്യവേദത്തിലുളള കഥകൾ ,പ്രാർത്ഥനകൾ എന്നിങ്ങനെമലയാളഗ്രന്ഥങ്ങൾരചിച്ചു്‌,അച്ചടിച്ചു്‌ പ്രസിദ്ധീകരിച്ചു. പണ്ഡിതപാമരന്മാർക്കു്‌ ഒരുപോലെ സ്വീകാര്യമായ "മധ്യമാർഗ്ഗ ഗദ്യ ശൈലിക്കു്‌"രൂപംകൊടുത്തു. ആധുനികഗദ്യത്തിന്റെ വികാസത്തിനു്‌ സഹായിച്ചു. സി.എം.എസ്സ്‌. കോളേജു്‌ പ്രിൻസിപ്പാൾ എന്ന നിലയിൽ, ഇംഗ്ലീഷ് പഠനം ആദ്യമായി തുടങ്ങി. പാശ്ചാത്യമാതൃകയിൽ ആധുനികവിദ്യാഭ്യാസത്തിന്റെ പാഠ്യപദ്ധതിക്കു്‌ തുടക്കം കുറിച്ചു. കോട്ടയത്തെ "ക്രൈസ്റ്റു്‌ ചർച്ചു്‌", ഗോദ്ഥിക് (Gothic) രീതിയിൽ രൂപകല്പപന ചെയ്തതും ഇദ്ദേഹമാണു്‌. ഒരു ആർക്കിടെക്ടു്‌ കൂടിയായ അദ്ദേഹത്തിന്റെ അർദ്ധകായ പ്രതിമ കോട്ടയത്തു്‌ നാഗമ്പടം മുൻസിപ്പൽപാർക്കിൽ സ്ഥാപിച്ചു്‌, നഗരം അദ്ദേഹത്തോടുളള ആദരം പ്രകടിപ്പിച്ചു.
  9. Dr. Herman Gundert. Dr. ഹെർമ്മൻ ഗുണ്ടർട്ടു്‌. .1859--ൽ ഗുണ്ടർട്ടു്‌ "മലയാളഭാഷാവ്യാകരണം" രചിച്ചു. മലയാളത്തിലെ ആധികാരിക വ്യാകരണമായിരുന്നു .1872-ൽ അദ്ദേഹം മലയാളം-ഇംഗ്ലീഷു്‌ ഡിക്ഷണറി പ്രസിദ്ധീകരിച്ചു. മലബാറിൽ ധാരാളം മലയാളം സ്കൂളുകൾ സ്ഥാപിച്ചു. കേരളോല്പത്തി(1843), പഴഞ്ചൊൽമാല (1845), പാഠമാല(ടെക്സ്റ്റ് ബുക്കു്‌), കേരളപ്പഴമ(1868), മലയാളരാജ്യം(1879-ജ്യോഗ്രഫി) എന്നിവ മറ്റുകൃതികൾ ആണു്‌. 1847 June -ൽ "രാജ്യസമാചാരം" , 1847 ഒക്ടോബറിൽ " "പശ്ചിമോദയം" എന്നീരണ്ടു്‌ ന്യൂസ്പേപ്പറുകളും അദ്ദേഹം തുടങ്ങി. മലയാളത്തിലെ ആദ്യത്തെ ന്യൂസ്പേപ്പറുകളാണിവ. തലശ്ശേരി സ്റ്റേഡിയത്തിനടുത്തു്‌ ഗുണ്ടർട്ടിന്റെ അർദ്ധകായ പ്രതിമ സ്ഥാപിച്ചു്‌ , അദ്ദേഹത്തിനോടുളള ആദരവു്‌ മലയാളികൾ പ്രകടിപ്പിച്ചു

ചുരുക്കത്തിൽ, അച്ചടി,പുസ്തകപ്രസിദ്ധീകരണം,ഇംഗ്ലീഷ് വിദ്യാഭ്യസം, സ്കൂളുകൾ, പത്രപ്രവർത്തനം, വ്യാകരണം,നിഘണ്ടു നിർമ്മാണം , ഭാഷാശാസ്ത്ര ഗവേഷണം തുടങ്ങിയവ വഴി ഭാഷയുടെയും ഗദ്യപദ്യ സാഹിത്യത്തിന്റയും വികാസത്തിനു്‌ തുടക്കമിട്ടതു്‌ മിഷണറിമാരാണു്‌.

ലിപിചരിത്രം.(ഉളളൂർ കേരളസാഹിത്യചരിത്രത്തിൽ)

ഉത്തരേന്ത്യയിൽ അതിപ്രാചീനകാലത്തു്‌ നിലനിന്നിരുന്ന "ബ്രാഹ്മി "യിൽ നിന്നാണു്‌ താഴെ പറയന്ന ലിപികൾ ഉണ്ടായതു്‌.

  1. വട്ടെഴുത്തു്‌.
  2. ഇന്നത്തെ ആന്ധ്ര-കർണ്ണാടക ലിപികൾ.
  3. കോലെഴുത്തു്‌.
  4. തമിഴു്‌ ലിപി.
  5. ഗ്രന്ഥാക്ഷരം
  6. മലയാണ്മ.
  7. മലയാളലിപി

വട്ടെഴുത്തു്‌

വട്ടെഴുത്തു്‌. വളരെ പ്രാചീനമായ ലിപി. ചേര , പാണ്ഡ്യ നാടുകളിൽ പ്രചാരമുളളതുകൊണ്ടു്‌ "ചേര-പാണ്ഡ്യ ലിപി" യെന്നും, "നാനം മോനം" ലിപിയെന്നും , വെട്ടെഴുത്തെന്നും ഇതിനു്‌ പലപേരുകൾ ഉണ്ടു്‌. ചെമ്പ് തകിടുകളിലും കോവിലകം വക എഴുത്തുകുത്തുകൾ, ഗ്രന്ഥവരികൾ എന്നിവയെല്ലാം എഴുതാൻ പതിനെട്ടാംശതകാന്ത്യം വരെ ഈ ലിപികൾ കേരളത്തിൽ ഉപയോഗിച്ചിരുന്നു. വട്ടെഴുത്തിന്റെ ഒരുമെച്ചം അതിനു്‌ പ്രാദേശിക ദേദം ഇല്ലായെന്നതായിരുന്നു. ന്യൂനതയാകട്ടെ ലിപികളുടെ എണ്ണക്കുറവും:- ഏ, ഓ ,എന്നിവയുടെ അഭാവം, സംയുക്താക്ഷരങ്ങളുടെ അഭാവം, പ,വ -കൾക്കും ക , ച -കൾക്കും ഒരുലിപിമാത്രമായതും, പിന്നീട് പതിനേഴാം ശതകത്തോടെ പ, വ, യ , ന ,ല ,ള -ഇവയ്ക്കെല്ലാം ഒരേ ലിപി തന്നെ ഉപയോഗിച്ചുതുടങ്ങിയതും വായിച്ചു്‌ മനസ്സിലാക്കാൻ പ്രയാസമുണ്ടാക്കി.

കോലെഴുത്തു്

വട്ടെഴുത്തിൽ നിന്നു്‌ കാലാന്തരത്തിൽ രൂപംകൊണ്ടതാണു്‌. രൂപത്തിൽ വട്ടെഴുത്തിൽ നിന്നും നേരിയ വ്യത്യാസങ്ങൾ എഴുതാനുളള സൗകര്യാർത്ഥം വരുത്തിയതാണു്‌. താളിയോലയിൽ കോലുകോണ്ടു്‌( നാരായം)എഴുതുന്നതാണു്‌ "കോലെഴുത്തു്‌" . സംവൃതോകാരത്തിനും ഏകാരത്തിനും ഓകാരത്തിനും പ്രത്യേകചിഹ്നങ്ങളുണ്ടു്‌ എന്നതു്‌ ഇതിന്റെ പ്രത്യേകതയാണു്‌. പ്രാദേശികമായ ഭേദങ്ങളുണ്ടു്‌.

മലയാണ്മ

ഇതും വട്ടെഴുത്തിൽ നിന്നും രൂപപ്പെടുത്തിയതാണു്‌. ചെറിയ വ്യത്യാസങ്ങളേയുളളു. ഇതു്‌ ഭാഷയുടെ പേരല്ല. ലിപിയുടെ പേരാണു്‌. തിരുവനന്തപുരത്തും തെക്കോട്ടും ഇത് വ്യാപിച്ചിരുന്നു.

തമിഴു്‌ ലിപി

കേരളത്തിലെ ഔദ്യോഗിക ഭാഷ , പത്തൊൻപതാം ശതകം (1860-65)വരെ തമിഴായിരുന്നു. ഉദ്യോഗസ്ഥരിലധികവും തമിഴ്നാട്ടുകാരും. മലയാളം തമിഴ്ലിപികളിലും എഴുതുക പതിവായിരുന്നു.

ഗ്രന്ഥാക്ഷരം (ആര്യയെഴുത്തു്‌.)

വട്ടെഴുത്തു്‌, കോലെഴുത്തു്‌, മലയാണ്മ, തമിഴു്‌ ലിപികൾ- ഇവയിൽ എല്ലാം "അതിഖരം, മൃദു , ഘോഷം " എന്നീ മൂന്നിനം അക്ഷരങ്ങൾ ഇല്ലായിരുന്നു. തന്മൂലം സംസ്കൃതവാക്കുകൾ തത്സമമായി എഴുതാൻ കഴിഞ്ഞിരുന്നില്ല. ഗ്രന്ഥലിപി സംസ്കൃത കൃതികളും(കവിതകളും) സംസ്കൃതനിബന്ധങ്ങളും( സംസ്കൃത ഗ്രന്ഥരചന)എഴുതാൻ ഉപയോഗിക്കുന്നു. പല്ലവ രാജാവായ നരസിംഹവർമ്മന്റെ (ക്രി.പി.ഏഴാം ശതകം) ശാസനങ്ങളിലാണു്‌ ആദ്യമായി ഈ ലിപികാണുന്നതു്‌. ക്രമേണ ദക്ഷിണേന്ത്യ മുഴുവൻ വ്യാപിച്ചു. ഗ്രന്ഥാക്ഷരം ഏതാണ്ടു്‌ ഒൻപതാം ശതകത്തോടെ മണിപ്രവാളകൃതികൾ എഴുതുവാൻ കേരളീയർ ഉപയോഗിച്ചിരുന്നു. ബ്രാഹ്മണർ ഉപയോഗിച്ചിരുന്നതുകൊണ്ടാകാം "ആര്യ എഴുത്തു്‌" എന്നു്‌ പേർ വീണതു്‌. വട്ടെഴുത്തും കോലെഴുത്തും മലയാണ്മയും ഉപയോഗിച്ചെഴുതിയ ഗ്രന്ഥങ്ങളിൽ അതിഖര, മൃദു, ഘോഷങ്ങൾ എഴുതേണ്ടിവരുമ്പോൾ ഗ്രന്ഥലിപി ഉപയോഗിച്ചു്‌ ആ അക്ഷരങ്ങൾ എഴുതുക പതിവായിരുന്നു.(ആര്യയെഴുത്തു്‌ നടപ്പാക്കിയതു്‌ എഴുത്തച്ഛനാണെന്ന വാദം അടിസ്ഥാനമില്ലാത്തതാണു്‌) ഗ്രന്ഥാക്ഷരത്തിനു്‌ തമിഴു ലിപിയോടു്‌ സാദൃശ്യം ഉണ്ടു്‌.

മലയാളലിപികൾ.

ആര്യയെഴുത്തിൽ നിന്നാണു്‌ രൂപംകൊണ്ടതു്‌. ചതുരവടിവിലുളള ഭംഗികുറഞ്ഞ ലിപികൾ. ഈ ലിപിയുടെ രൂപം പരിഷ്കരിച്ചതു്‌ ബെഞ്ചമിൻ ബയ്ലിയാണു്‌. ഈ ആറു ലിപികളും ഒരേസമയം നിലവിലുണ്ടായിരുന്നു. ബഞ്ചമിൻ ബയിലി അച്ചടി ആരംഭിക്കാനായി "കൊല്ലൻ ,തട്ടാൻ "തുടങ്ങിയവരുടെ സഹായത്തോടെ മലയാളലിപികളായി "ഉരുണ്ടലിപികൾ" രൂപപ്പെടുത്തിയതോടെ മലയാള ലിപികൾക്കു്‌ ഐകരൂപ്യം വന്നു. അച്ചടി മലയാളലിപികൾക്കു്‌ ഐകരൂപ്യം ഉണ്ടാക്കി.

ചോദ്യങ്ങളും ഉത്തരങ്ങളും

Question1:-കേരളത്തിൽ അച്ചടിക്കു്‌ തുടക്കം കുറിച്ചവർ ആരു്‌?


A-ഇംഗ്ലീഷുകാർ.

B-ഡച്ചുകാർ.

C-പോർട്ടുഗീസുകാർ.

D-ഫ്രഞ്ചുകാർ.


പോർട്ടുഗീസുകാർ


Question2:-ആദ്യമായി മലയാള ലിപി അച്ചടിച്ചതു്‌ ഏതു ഗ്രന്ഥത്തിൽ


സംക്ഷേപവേദാർത്ഥം.

വേദതർക്കം

കേരളപ്പഴമ

ഹോർത്തൂസ് മലബാറിക്കുസു്‌


ഹോർത്തൂസ് മലബാറിക്കുസു്‌


Question3:- "ഹോർത്തൂസ് മലബാറിക്കുസു്‌ " അച്ചടിച്ചതു്‌ എവിടെ?


ലണ്ടനിൽ

ആംസ്റ്റർഡാമിൽ

ലിസ്ബണിൽ

ബർളിനിൽ.


ആംസ്റ്റർഡാമിൽ.


Question4:- " ഹോർത്തൂസ് മലബാറിക്കൂസു്‌" ഏതു്‌ ഭാഷയിലാണു്‌ പ്രസിദ്ധീകരിച്ചതു്‌?


ലാറ്റിൻ

ഇംഗ്ലീഷു്

പോർട്ടുഗീസു്

സ്പാനീഷു്


ലാറ്റിൻ


Question5:- ഹോർത്തൂസ് മലബാറിക്കൂസിന്റെ പ്രസിദ്ധീകരണത്തിൽ സഹായിച്ച കേരളീയ വൈദ്യൻ ആരു്‌?


ഈച്ചരവാര്യർ.

വയസ്ക്കരമൂസ്സതു്‌.

കുഞ്ഞിരാമൻ വൈദ്യൻ

ഇട്ടി അച്യുതൻ


ഇട്ടി അച്യുതൻ


Question6:- ആദ്യന്തം മലയാളം "അച്ചു" പയോഗിച്ചു്‌ റോമിൽ അച്ചടിച്ച "ആദ്യ മലയാളഗ്രന്ഥം" ഏതു്‌.?


ഹോർത്തൂസ് മലബാറിക്കൂസു്

വർത്തമാനപ്പുസ്തകം.

സംക്ഷേപവേദാർത്ഥം

കേരളപ്പഴമ


സംക്ഷേപവേദാർത്ഥം.


Question7:- കോട്ടയത്തു്‌ സി.എം.എസ്സു്‌ .പ്രസു്‌ ആരംഭിച്ചതു്‌ ആരു്‌?


പാറേന്മാക്കൽ തോമാകത്തനാർ

ബഞ്ചമിൻ ബെയിലി

ഹെർമ്മൻ ഗുണ്ടർട്ടു്

റോബർട്ട് ഡ്രമണ്ടു്‌


ബഞ്ചമിൻ ബെയിലി


Question8:- മലയാളത്തിലെ ആദ്യത്തെ യാത്രാവിവരണ ഗ്രന്ഥം?


വർത്തമാനപ്പുസ്തകം.

വർത്തമാനപ്പത്രിക.

വർത്തമാനകാലചരിത്രം

യാത്രാവിവരണം


വർത്തമാനപ്പുസ്തകം.


Question9:- CMS പ്രസ്സിൽ അച്ചടിച്ചു്‌ പ്രസിദ്ധീകരിച്ച , "ചെറുപൈതങ്ങൾക്കു്‌ ഉപകാരാർത്ഥം പരിഭാഷപ്പെടുത്തിയ കഥകൾ " എഴുതിയതു്‌ ആരാണു്‌ ?


ഹെർമ്മൻ ഗുണ്ടർട്ടു്‌

അർണ്ണോസ് പാതിരി

ക്ലമന്റു്‌ പാതിരി

ബഞ്ചമിൻ ബെയിലി


ബഞ്ചമിൻ ബെയിലി


Question10:- ഹെർമ്മൻ ഗുണ്ടർട്ടിന്റെ കൃതിയല്ലാത്ത പുസ്തകം ഏതു്‌?


മലയാളഭാഷാവ്യാകരണം

ഭാഷാഭൂഷണം

കേരളോല്പത്തി

കേരളപ്പഴമ



ഭാഷാഭൂഷണം


Question11:- പ്രാചീനകാലത്തു്‌ ഉത്തരേന്ത്യയിൽ നിലനിന്നിരുന്ന ലിപി?


ബ്രാഹ്മി

തമിഴു്

വട്ടെഴുത്തു്

കോലെഴുത്തു്


ബ്രാഹ്മി


Question12:- വട്ടെഴുത്തു്, കോലെഴുത്തു്‌, മലയാണ്മ, തമിഴു്‌-ഈ ലിപികൾക്കു്‌ പൊതുവായ ഒരുസ്വഭാവം?


അതിഖരം,മൃദു,ഘോഷം ഇവയില്ല

അതിഖരം,മൃദു ,ഘോഷം എന്നിവയുണ്ടു്‌

അതിഖരം മാത്രം ഇല്ല

ഇതൊന്നുമല്ല.


അതിഖരം,മൃദു,ഘോഷം ഇവയില്ല


Question13:-"നാനംമോനം" എന്നറിയപ്പെടുന്ന ലിപി?


കോലെഴുത്തു്‌

മലയാണ്മ

വട്ടെഴുത്തു്

തമിഴു്‌ ലിപി


വട്ടെഴുത്തു്


Question14:-ബ്രാഹ്മി ലിപിയിൽ നിന്നും ഉണ്ടായതായി വിശ്വസിക്കുന്ന ലിപി?


വട്ടെഴുത്തു്

മലയാളലിപി

തമിഴു്‌ ലിപി

കോലെഴുത്തു്


വട്ടെഴുത്തു്


Question15:- സംസ്കൃതനിബന്ധങ്ങളെഴുതാൻ ഉപയോഗിച്ചിരുന്ന ലിപി?


തമിഴു്‌ ലിപി.

വട്ടെഴുത്തു്

കോലെഴുത്തു്‌

ഗ്രന്ഥാക്ഷരം


ഗ്രന്ഥാക്ഷരം


Question16:- ആര്യയെഴുത്തു്‌ എന്നറിയപ്പെടുന്ന ലിപിയേതു്‌?


മലയാണ്മ

കോലെഴുത്തു്

ഗ്രന്ഥാക്ഷരം

വട്ടെഴുത്തു്‌


ഗ്രന്ഥാക്ഷരം